დადგენილება №29/2017
27 მარტი, 2017
,,სსიპ – ივანე ჯავახიშვილის სახელობის თბილისის სახელმწიფო უნივერსიტეტის აკადემიური პერსონალის (პროფესორი, ასოცირებული პროფესორი, ასისტენტ-პროფესორი) შრომის ანაზღაურების (თანამდებობრივი სარგო და დანამატი) ოდენობისა და პირობების დადგენის შესახებ“ აკადემიური საბჭოს 2013 წლის 4 ოქტომბრის №112/2013 დადგენილებაში ცვლილებებისა და დამატებების შეტანის შესახებ“ აკადემიური საბჭოს 2014 წლის 29 დეკემბრის №122/2014 დადგენილების ამოქმედების პირობების განსაზღვრის შესახებ
საქართველოს ზოგადი ადმინისტრაციული კოდექსის 51-ე მუხლის პირველი ნაწილის, 52–ე მუხლის პირველი და მე–2 ნაწილების, 53–ე მუხლის მე–3 ნაწილის, 54–ე მუხლის პირველი ნაწილის, 55-ე მუხლის, 57-ე მუხლის, საქართველოს განათლებისა და მეცნიერების მინისტრის 2013 წლის 11 სექტემბრის №135/ნ ბრძანებით დამტკიცებული „საჯარო სამართლის იურიდიული პირის – ივანე ჯავახიშვილის სახელობის თბილისის სახელმწიფო უნივერსიტეტის წესდების“ მე-7 მუხლის პირველი პუნქტის, მე–8 მუხლის პირველი პუნქტის „პ“ ქვეპუნქტით გათვალისწინებული უფლებამოსილებიდან გამომდინარე, ამავე მუხლის პირველი პუნქტის ,,წ“ ქვეპუნქტის, უნივერსიტეტის აკადემიური საბჭოს 2014 წლის 14 ივლისის №73/2014 დადგენილებით დამტკიცებული აკადემიური საბჭოს რეგლამენტის მე-5 მუხლის პირველი პუნქტის „რ“ ქვეპუნქტისა და უნივერსიტეტის აკადემიური საბჭოს 2017 წლის 27 მარტის №6 სხდომის ოქმის საფუძველზე,
აკადემიური საბჭო ადგენს:
1. ,,სსიპ – ივანე ჯავახიშვილის სახელობის თბილისის სახელმწიფო უნივერსიტეტის აკადემიური პერსონალის (პროფესორი, ასოცირებული პროფესორი, ასისტენტ-პროფესორი) შრომის ანაზღაურების (თანამდებობრივი სარგო და დანამატი) ოდენობისა და პირობების დადგენის შესახებ“ აკადემიური საბჭოს 2013 წლის 4 ოქტომბრის №112/2013 დადგენილებაში ცვლილებებისა და დამატებების შეტანის შესახებ“ აკადემიური საბჭოს 2014 წლის 29 დეკემბრის №122/2014 დადგენილების პირველი, მე-2 და მე-3 პუნქტები, შესაბამისად ამ პუნქტებით განსაზღვრული პირობები (გარდა დადგენილების მეორე პუნქტით დამტკიცებული №2 დანართის მე-3 და მე-5 პუნქტებისა და №3 დანართის მე-3 პუნქტის „გ“ ქვეპუნქტისა) 2021 წლის 5 აპრილამდე ძალაშია, როგორც სარეკომენდაციო (არასავალდებულო) ხასიათის პირობები და შესასრულებლად სავალდებულო ძალა შეიძინოს 2021 წლის 5 აპრილიდან.
2. თსუ ფაკულტეტებს მიეცეთ 2018 წლის 5 აპრილამდე აკადემიური საბჭოს 2014 წლის 29 დეკემბრის №122/2014 დადგენილების მე-3 პუნქტით აკადემიური საბჭოს 2013 წლის 4 ოქტომბრის №112/2013 დადგენილების ცვლილების სახით გათვალისწინებული, 88 პუნქტით დამტკიცებულ №8 დანართში (,,სამეცნიერო-კვლევითი პროდუქციის კლასიფიკაცია“) ცვლილებებისა და დამატებების რეკომენდაციების სახით ინიცირების და სამეცნიერო-კვლევითი პროდუქციის კლასიფიკაციის დოკუმენტში მათი ასახვის მიზანშეწონილობის განსაზღვრის მიზნით შექმნილ უნივერსიტეტის სამეცნიერო საბჭოში წარდგენის უფლებამოსილება. საბჭოს შემადგენლობა და საქმიანობის ვადები განისაზღვრება თსუ რექტორის ბრძანებით.
3. წინამდებარე დადგენილების მე-2 პუნქტით გათვალისწინებული სამეცნიერო საბჭო იქმნება უნივერსიტეტის რექტორის ბრძანებით, გარე რეფერირების პრინციპების გათვალისწინებით.
4. დადგენილების ყველასათვის ხელმისაწვდომ ადგილზე განთავსება დაევალოს უნივერსიტეტის კანცელარიას.
5. აღნიშნული გადაწყვეტილება დასამტკიცებლად წარედგინოს სსიპ – ივანე ჯავახიშვილის სახელობის თბილისის სახელმწიფო უნივერსიტეტის წარმომადგენლობით საბჭოს.
6. წინამდებარე დადგენილება დაინტერესებული პირის მიერ შეიძლება გასაჩივრდეს კანონმდებლობით დადგენილი წესით ძალაში შესვლის დღიდან 1 თვის ვადაში ქ. თბილისის საქალაქო სასამართლოს ადმინისტრაციულ საქმეთა კოლეგიაში (მისამართი: ქ. თბილისი, დავით აღმაშენებლის ხეივანი, მე–12 კილომეტრი, №6).
7. დადგენილება ძალაში შევიდეს კანონმდებლობით დადგენილი წესით.
გიორგი შარვაშიძე
რექტორი
აკადემიური საბჭოს თავმჯდომარე