ევროპის ლექსიკოგრაფთა ასოციაციის მე-17 საერთაშორისო კონგრესი თბილისში

ივანე ჯავახიშვილის სახელობის თბილისის სახელმწიფო უნივერსიტეტში  ევროპის ლექსიკოგრაფთა ასოციაციის მე-17 საერთაშორისო ლექსიკოგრაფიული კონგრესი გაიხსნა. ღონისძიებაში თსუ რექტორის მოვალეობის შემსრულებელმა დარეჯან თვალთვაძემ, საქართველოს განათლებისა და მეცნიერების მინისტრის მოადგილემ გიორგი შარვაშიძემ,  მსოფლიოს წამყვანი ლექსიკოგრაფებმა, გამომცემლებმა, მკვლევრებმა, პროგრამისტებმა და ზოგადად ლექსიკოლოგია-ლექსიკოგრაფიით დაინტერესებულმა პირებმა მიიღეს მონაწილეობა.
თსუ რექტორის მოვალეობის შემსრულებლის დარეჯან თვალთვაძის განცხადებით, „ევროპის ლექსიკოგრაფთა ასოციაციის კონგრესი ტარდება ორ წელიწადში ერთხელ ევროპის სხვადასხვა ქვეყანაში და წელს არის პირველი შემთხვევა, როდესაც ამ კონგრესს მასპინძლობს ევროკავშირის არაწევრი ქვეყანა. კონგრესზე განიხილება მნიშვნელოვანი საკითხები - ლექსიკოგრაფია, ლინგვისტიკა, ის თემები, რომელზეც მსოფლიოს ბევრ უნივერსიტეტში და  სამეცნიერო ცენტრებში მუშაობენ.  რასაკვირველია, ეს საკითხები ჩვენი უნივერსიტეტისთვისაც ძალიან მნიშვნელოვანი და აქტუალურია.“
„ევროპის ლექსიკოგრაფთა ასოციაცია გასული საუკუნის 80-იან წლებში შეიქმნა და სწორედ მაშინ ჩამოყალიბდა ამ კონფერენციის მოდელი. კონგრესის ეს მოდელი შთამბეჭდავია იმიტომ, რომ ძალიან მკაცრად გაწერილი წესებით ტარდება და ამ წესების მიდევნება არის გარანტია მაღალი აკადემიური დონისა. კონფერენციაზე წარმოდგენილია თემატიკა, რომელიც სრულად წარმოაჩენს ამ უაღრესად რთულ და მრავალი კომპონენტის მომცველ ინტერდისციპლინურ დარგს, რომელიც ძალიან მნიშვნელოვანია, იმიტომ, რომ ლექსიკოგრაფია არის დაკავშირებული ენასთან და ენა კი  ყველა ქვეყნისათვის უაღრესად მნიშვნელოვანია,“- აღნიშნა თსუ ლექსიკოგრაფიული ცენტრის ხელმძღვანელმა თინათინ მარგალიტაძემ.
საქართველოს განათლებისა და მეცნიერების მინისტრის მოადგილის გიორგი შარვაშიძის განცხადებით, „პოსტსაბჭოთა სივრცეში საქართველო პირველი ქვეყანაა, რომელსაც ერგო პატივი  უმასპინძლოს ამ კონგრესს. ლექსიკოგრაფიას, ზოგადად, ძალიან დიდი ისტორიაა აქვს საქართველოში, მე-17 საუკუნიდან იწყება მისი ისტორია. მნიშვნელოვანია, რომ თსუ-ში იმართება ეს შეკრება, რადგან ამ ტრადიციის აღორძინება, სწორედ, უნივერსიტეტის კედლებს უკავშირდება.  დღეს 21-ე საუკუნეში, როდესაც შემოდის ახალი დიგიტალური მეთოდოლოგიები, როდესაც იცვლება შინაარსი ლექსიკოგრაფიის, ძალიან მნიშვნელოვანია, რომ შევაჯეროთ ჩვენი მაჯისცემა ჩვენს კოლეგებთან მთელი მსოფლიოდან.“    
საერთაშორისო კონგრესზე, რომელშიც მსოფლიოს 40 ქვეყანიდან 150 დელეგატი მონაწილეობს,   მსოფლიოს 40 ენის შესხაებ 100 მოხსენება იქნება წარმოდგენილი. კონგრესის პროგრამა მოიცავს საჯარო ლექციებსა და სექციურ სხდომებს სხვადასხვა თემაზე, კომპიუტერული პროგრამების პრეზენტაციას, დისკუსიას მრგვალ მაგიდასთან,  სპეციალიზებულ სემინარებს კონგრესის წინა  პერიოდში,  წიგნებისა და კომპიუტერული პროგრამების გამოფენას, აგრეთვე, კულტურულ პროგრამას კონგრესის მონაწილეთათვის და მათი სტუმრებისათვის.
კონგრესზე საჯარო ლექციებს წაიკითხავენ ცნობილი ევროპელი მეცნიერები, პატრიკ ჰენქსი (დიდი ბრიტანეთი), რობერტ ილსონი (დიდი ბრიტანეთი), იოსტ გიპერტი (გერმანია), ჯეფრი უილიამსი (საფრანგეთი), პიუს ტენ ჰაკენი (ავსტრია). მრგვალი მაგიდის მოდერატორი იქნება ტიერი ფონტენელი (ბელგია, ევროპის კავშირის დაწესებულებათა მთარგმნელობითი ცენტრის ხელმძღვანელი).    
თბილისის კონგრესის დევიზია „ლექსიკოგრაფია და ლინგვისტური მრავალფეროვნება,“ რაც მიუთითებს კონგრესის ერთ-ერთ უმთავრეს მიზანს, კერძოდ ლექსიკოგრაფიის მნიშვნელობის წარმოჩენას ლინგვისტური მრავალფეროვნების შესანარჩუნებლად. კონგრესის დევიზს კარგად ესადაგება ოქსფორდის უნივერსიტეტის ახალი პროექტი - ოქსფორდის მსოფლიო ენები, რომლის პრეზენტაცია სწორედ კონგრესის გახსნის დღეს გაიმართება თბილისის სახელმწიფო უნივერსიტეტში.    
ლექსიკოგრაფია, ლექსიკონები მჭიდროდაა დაკავშირებული ენასთან, რომელიც  გადამწყვეტ როლს ასრულებს ამა თუ იმ ხალხის იდენტობისა და კულტურის განსაზღვრაში. ეროვნული თვითმყოფადობის ჩამოყალიბებასა და შენარჩუნებაში ენას ცენტრალური როლი ეკუთვნის, ხოლო ლექსიკონი წარმოადგენს უმთავრეს ინსტრუმენტს ამ იდენტობის შესაცნობად და წარმოსაჩენად. ლექსიკონები ქვეყანაში ენობრივი პოლიტიკის გატარების მძლავრი ინსტრუმენტია.     
ლექსიკოგრაფიის მნიშვნელობის გაცნობიერებამ ეროვნული  სახელმწიფოებრიობისათვის, მეცნიერებისა და კულტურის განვითარებისათვის, სასკოლო და საუნივერსიტეტო განათლებისათვის განაპირობა ლექსიკოგრაფიული აქტივობის უპრეცედენტო აღმავლობა ევროპასა და ამერიკაში. სწორედ ამ პერიოდში შეიქმნა ევროპის ლექსიკოგრაფთა ასოციაციაც.    
ევროპის ლექსიკოგრაფთა ასოციაცია გასული საუკუნის 80-იან წლებში შეიქმნა. იგი წამყვანმა ევროპელმა ლექსიკოგრაფებმა და ლინგვისტებმა დააფუძნეს და შექმნეს საერთაშორისო კონგრესის შთამბეჭდავი მოდელი, რომელიც ყოველ ორ წელიწადში ერთხელ იმართება და მაღალი სამეცნიერო დონით გამოირჩევა. 16 კონგრესი ევროპის სხვადასხვა ქვეყანაში ჩატარდა, საქართველო კი არის  ევროკავშირის პირველი არაწევრი ქვეყანა, სადაც ასოციაციის მე-17 საერთაშორისო კონგრესი გაიმართება.